[სანტიაგო გაუჩო]
ყოფილი საბჭოთა კავშირის არსებობის პერიოდში მრავალი ორიგინალური, მხოლოდ ბოლშევიკური ან კომუნისტური პარტიისათვის მიღებული დღესასწაული აღინიშნებოდა, მაგრამ ახალ წელთან ერთად არსებობდა ერთი ღირთშესანიშნავი თარიღი, რომლის დადგომასაც ყველა ჩვენთაგანი მოუთმენლად ელოდა. მას რვა მარტს ზეიმობდნენ. გაზაფხულის ამ ლამაზ დღეს საზეიმოდ ხვდებოდნენ საქართველოშიც. ქალის პატივისცემა ჩვენს ქვეყანაში არავის ესწავლება და დედის, მეუღლის, შეყვარებულის ან უბრალოდ მოხდენილი ქალის კულტი ოდითგანვე მოგვდევს. რვა მარტს ამ პატივისცემას კიდევ ერთხელ განსაკუთრებულად ავღნიშნავდით და ქართველ ქალებს მართლაც რომ ლამაზი საჩუქრებით ვასაჩუქრებდით.ბევრმა არ იცის და რვა მარტის დღესასწაულს დღეს 100 წელი უსრულდება. ეს “კომუნისტური” ზეიმი თავის დროზე, 1910 წელს დაარსდა, მეორე საერთაშორისო კონფერენციაზე, როგორც თანასწორობისათვის მებრძოლ მშრომელ ქალთა საერთაშორისო სოლიდარობის დღე. ეს სიახლე პირველად 1911 წელს აღინიშნა გერმანიაში, ავსტრიაში, შვეიცარიასა და დანიაში ლოზუნგით–„მუშა ქალთა საარჩევნო უფლებები, სოციალიზმისათვის ბრძოლაში“. დაგაბრუნეთ დროებით ძველი თაობებისათვის ნაცნობ გარემოში, მაგრამ ეს ისტორიაა და მას ვერ გაექცევი. ერთი კი ნათელია, ამ კომუნისტებს ბევრი ნაკლოვანება გააჩნდათ, მაგრამ ერთი კარგი ზეიმი მაინც გვაჩუქეს. საბედნიეროდ რვა მარტის დღესასწაულს საბჭოთა რეჟიმის გაქრობასთან ერთად გადაგვარება არ ეწერა და მას უკვე ქალთა დღედ მოვიხსენიებთ. ეხლა კი უშუალოდ მამაკაცებს მინდა რომ მივმართო. მიღებულია აზრი, რომ “სუსტი სქესის” არსებები განსაკუთრებულ ფაქიზ მოპყრობასა და მიდგომას მოითხოვენ. მათი თანაგრძნობის მონადირება იოლი არ არის და თითოეული ქალის გულს განსაკუთრებული გასაღები უნდა მოარგო. საყვარელ მეუღლეებს ალერსიანი სიტყვებით ხშირად უნდა მიმართოთ. ეცადეთ იყოთ მრავალფეროვანი, კომპლიმენტებსა და საყვარელი არსებებისათვის მირთმეულ საჩუქრებში. რაც ყველაზე მთავარია, ნუ ეცდებით რომ გაანალიზოთ ქალის ლოგიკა, ნუ იქნებით პრინციპული სხვადასხვა კონფლიქტებში. ხანდახან თქვენთვის საყვარელ მანდილოსანს სხვა მამაკაცის თვალით შეხედეთ, რადგან ძნელი წარმოსადგენია, რომ მასთან დაშორების შემდეგ მეორე უფრო იდეალური იქნება. გახსოვდეთ, რომ ქალის ხასიათი პლასტელინს ჰგავს, რაც უფრო ხშირად შეეხებით ხელით, მით უფრო რბილი და მოქნილი გახდება. თქვენი საყვარელი “პლასტელინისათვის” იდეალური მამაკაცის იმიჯს რომ მიესადაგებოდეთ, ინგლისელი ფსიქოლოგების გამოკვლევის შედეგებს გაგაცნობთ. ეს არის იმ თვისებებისა და ჩვევების ჩამონათვალი, რომლებიც ქალებს ძალიან აღიზიანებთ. გირჩევთ, რომ ყურადღებით გაეცნოთ მას და გარწმუნებთ, რომ თუ ამ რჩევებს სათანადოდ გაითავისებთ, საყვარელი მანდილოსნების წინაშე უფრო ამაღლდებით და გაცილებით ნაკლები პრობლემები შეგექმნებათ. მამაკაცების იმ თვისებებიდან, რომლებიც ქალებს სიცოცხლეს უმწარებს, პირველ ადგილზე მანქანის სიყვარული დგას. როდესაც “ძლიერთა სქესის” წარმომადგენელი საკუთარ მოძრავ საშუალებას განსაკუთრებულ ყურადღებას უთმობს, ქალი ამ დროს თურმე მიტოვებულად გრძნობს თავს და ეჭვიანობას იწყებს. მართლაც რომ ვერ გაუგებ ამ არსებებს. როგორ შეიძლება რომ ასეთი მიამიტი იყო და რაღაც რკინის გროვაზე ინერვიულო. გასაკვირია და შემდეგ პოზიციას წინდებით სექსი იკავებს. ფსიქოლოგების გამოკვლევებით შიშველი მამაკაცი წინდებით, ქალში სიმპათიებს ნამდვილად არ იმსახურებს. რა დაგემართათ კაცებო. სექსის წინ მთელ ტანსაცმელს იხდით და ეს ოხერი წინდებიც გაიძერით, სამაგიეროდ პარტნიორ მანდილოსნებს ნამდვილად ასიამოვნებთ. მესამე საპრიზო ადგილზე უკბილო ხუმრობები გავიდა. თურმე ქალის გამხიარულება იმ ანეკდოტებით, რომლებიც მამაკაცების საზოგადოებაში სიცილ-ხარხარს იწვევს, მეტად სარისკო ნაბიჯია, რადგან ევას შთამომავლებს მათზე საერთოდ არ ეღიმებათ. ქალებთან სათანადოდ მოპყრობის „სპეციალისტები“ გვირჩევენ, რომ „ამ კატეგორიის ხალხთან “ ანუ დიაცებთან, მათთვის რთულად აღსათქმელი ანეკდოტების მოყოლას თავი დავანებოთ. ჭუჭყიანი ფეხსაცმელების ხილვა არავის სიამოვნებს, მაგრამ განსაკუთრებული გართულება მასზე მაინც ქალებს აქვთ. ისინი ყურადღებას არ აქცევენ ლამაზ ჰალსტუხს ან პიჯაკს, მაგრამ თუ ფეხსაცმელში გაცვეთილ ქუსლს, გახსნილ ზონრებსა და ჭუჭყიან ზედაპირს დაინახავენ, ზურგს შეგაქცევენ და საბოლოოდ დაგემშვიდობებიან. ქალებს არ უყვართ მამაკაცის მოუვლელი ფრჩხილები. არ გაიგოთ ისე, რომ სილამაზის სალონებში სიარულს გირჩევთ, მაგრამ ფრჩხილების ნაწილობრივი მოვლა სახლის პირობებშიც გარკვეულწილად შეიძლება. ყურადღება მიაქციეთ იმ საჩუქრებს, რომლებსაც საყვარელ, მდედრობითი სქესის ადამიანებს უმზადებთ. თუ კაცი ქალს დაბადების დღეზე მტვერსასრუტს აჩუქებს, ხოლო ახალ წელს იატაკის ჯოხით გააბედნიერებს, რასაკვირველია ეს მანდილოსნის დიდ გაღიზიანებას გამოიწვევს. ამიტომ უმჯობესია რომ ახლობელი ქალი საოჯახო ინვენტარით არ დაასაჩუქროთ. თუნდაც ცოცხი ან მაგიდის ტილო მართლაც რომ საჭირო ნივთებია, მაგრამ იყავით ბოლომდე რომანტიულები. ქალები მრავალი კაპრიზული იდეებით გამოირჩევიან. ისინი ვერ იტანენ იმ მამაკაცებს რომლებიც საწოლში ჩუმად არიან და საკუთარ ფიქრებში განმარტოვებულან. იგივე მანდილოსნები გაურბიან ლოგინში განსაკუთრებულად მოლაყბე “ძლიერთა სქესის” წარმომადგენლებსაც. ამ საკითხში მართლაც რომ ვეთანხმები ქალებს, რადგან აუტანელია სექსის დროს ალასანიასა და ნოღაიდელის პოლიტიკურ ამბიციებზე აზრების მოსმენა. ქალი ამ დროს საალერსო სიტყვებს ელის და იმ დღის ამბების გაგება, თუნდაც საყვარელი მამაკაცის გადმოცემით, მისთვის დიდად გამაღიზიანებელი ფაქტორია. ფსიქოლოგები მწეველ კაცებს ურჩევენ, რომ არომატული თხევადი საპნები გამოიყენონ, რადგან მანდილოსნები ღიზიანდებიან მამაკაცის თითებიდან წამოსული თამბაქოს სუნზე. ისე გულზე ხელი დაიდეთ ძვირფასო კაცებო და თქვენც ხომ არ მოგწონთ, როდესაც ახლობელ ქალებს ხახვის, სოუსის ან ზეთის სუნი ასდით. უკანასკნელი რჩევა მამაკაცებისათვის კი ის არის, რომ ყველა ღილზე შეკრული პიჯაკი ისეთივე ცუდ ტონად ითვლება, როგორც გრძელი ფრჩხილები და თეთრი წინდები. ნორმალურ პიჯაკზე ბოლო ღილი აუცილებლად შეხსნილი უნდა იყოს. თქვენ შეიძლება ამ პატარა ნიუანს ყურადღებას არ აქცევდეთ, მაგრამ თქვენი თანხმლები მანდილოსანი ამით ნამდვილად დაინტერესდება. ამ უსასრულო რჩევების დასასრულს მაინც მგონია რომ მამაკაცებს მართლაც რომ სასარგებლო წინადადებები მივაწოდე. თქვენ კი მანდილოსნებო, კიდევ ერთხელ გილოცავთ ქალთა დღეს. ყოველივე კარგს გისურვებთ და გამოვთქვამ რწმენას, რომ თუ ამ პატარა მასალაში მოცემულ განმარტებებს თქვენს ახლობელ მამაკაცებს წააკითხებთ, ცხოვრება კიდევ უფრო გაგილამაზდებათ. |
.jpg)
