• თბილისი
  • 31°C
  • 19 სექტემბერი, 2017
article

კუჭის წყლული და სიმპტომები

კუჭისა და თორმეტგოჯა ნაწლავის წყლულოვანი დაავადების დროს, აღინიშნება  ლორწოვან გარსში მკვეთრი საზღვრების მქონე მრგვალი ან ოვალური დესტრუქციული (დაშლილი) კერები. წყლულის დიამეტრი სულ მცირე 5 მ-ია, ის ლორწოვანის კუნთოვან შრემდე ვრცელდება.

წყლული ვითარდება ლორწოვანი გარსის დამცავი უნარის დაქვეითების ფონზე მჟავასა და პეპსინის ზემოქმედების შედეგად. წყლულოვანი დაავადების გამომწვევი მიზეზებია: კუჭის წვენის გაძლიერებული სეკრეცია (გამოყოფა); არასტეროიდული ანთების საწინააღმდეგო საშუალებების ხანგრძლივი გამოყენება; გენეტიკური წინასწარგანწყობა; თამბაქოს წევა; ფსიქოლოგიური სტრესი.

წყლულოვანი დაავადების ძირითადი სიმპტომია ტკივილი, რომელიც განსხვავდება იმის მიხედვით, წყლული არის კუჭში თუ თორმეტგოჯა ნაწლავში: კუჭის წყლულის დროს ტკივილი არის ეპიგასტრიუმის არეში, რომელიც იწყება ჭამიდან 5-15 წუთის შემდეგ და გრძელდება კუჭის შიგთავსის გადასვლამდე თორმეტგოჯა ნაწლავში ან ღებინებამდე.

თორმეტგოჯა ნაწლავის წყლულისთვის დამახასიათებელია რითმული ტკივილი, რომელიც იხსნება საკვების ან ანტაციდების (სიმჟავის დასაქვეითებელი პრეპარატები) მიღების შემდეგ. ტკივილი იწყება უზმოზე ანუ “მშიერ ტკივილი” ან ჭამიდან 1,5-4 საათის შემდეგ, ტიპიურია ღამის ტკივილი. ტკივილი გადაეცემა მარჯვენა ფერდქვეშა არეში.

წყლულოვანი დაავადების დროს ზოგჯერ აღინიშნება დისპეფსიური მოვლენები: გულძმარვა, ღებინება, გულისრევა და მჟავე ბოყინი. აღსანიშნავია, რომ წყლულოვან დაავადებას ახასიათებს სეზონურობა.