ყუბანელები ამბობენ, რომ ხელისუფლება წყალდიდობის შედეგად გარდაცვლილთა რაოდენობაზე საუბრისას ცრუობს და კატასტროფის მასშტაბებს ამცირებენ. ადამიანები ყვებიან, რომ წინა დღეებში, ღამ-ღამობით გვამებით სავსე ტომრები გაჰქონდათ. მაგალითად, ადგილობრივი ტელეკომპანია „ელექტრონი“ იუწყება, რომ მხოლოდ ერთ ჯერზე ერთ-ერთ მორგში 400 გარდაცვლილის ცხედარი მიიტანეს.

„რა 170 ადამიანი. სოფელი ბაკანკა უკვე აღარ არსებობს. სოფელი, რომელშიც 500 მოსახლე იყო, აღარ არის. ღამ-ღამობით გვამებით სავსე ტომრები კამაზებით გააქვთ - 300-500 ტომარა ერთ რეისზე“ - დაწერა სოციალურ ქსელში კრასნოდარის მკვიდრმა ოლგა გორინამ.

„ქუჩაზე, რომელზეც ჩემი ძმა ცხოვრობდა, სახლებიდან 73 ცხედარი გამოიტანეს“ - აღნიშნავს ის.

ტრაგედიის მოწმე ადამიანები, ვინც გადარჩნენ, წერენ, რომ ეს ჯოჯოხეთი იყო. ისინი ამბობენ, რომ ხელისუფლების არცერთი სიტყვის არ სჯერათ, მითუმეტეს, რომ ხელმძღვანელობა უკვე გადარჩენილთათვის დახმარების ორგანიზებულად გაცემასაც კი ვერ ახერხებს.

როგორც ცნობილი ხდება, გამოძიების წინასწარი შედეგებით ტრაგედიის მიზეზად ბუნებრივი მოვლენები სახელდება, ხოლო მოქალაქეთათვის მოსალოდნელი კატასტროფის შეტყობინების სისტემის არარსებობა, განიხილება, როგორც ტრაგედიის ხელშემწყობი ფაქტორი.
internet.ge