საქართველოს პროკურატურამ ელექტრონული წარმოების პროგრამით, შუამდგომლობით მიმართა თბილისის საქალაქო სასამართლოს ტელეკომპანია "მაესტროს" კუთვნილ ანტენებზე ყადაღის გამოყენების თაობაზე.

საქალაქო სასამართლოს ინფორმაციით, აღნიშნული შუამდგომლობა სასამართლომ ზეპირი მოსმენის გარეშე განიხილა და დააკმაყოფილა.

პროკურატურის ინფორმაციით, სატელევიზიო ანტენების უსასყიდლოდ გადაცემით ამომრჩეველთა მოსყიდვის ფაქტებზე, 2012 წლის 20 ივნისს დაწყებული გამოძიების ფარგლებში, დადგენილ იქნა, რომ პოლიტიკური ორგანიზაცია "ქართულ ოცნებასთან" დაკავშირებული კომპანია „ელიტა ბურჯის" ხელმძღვანელ პირთა დავალებით, კომპანია „მაესტრომ" საქართველოში შემოიტანა დიდი ოდენობით ანტენები.

პროკურატურის განცხადებით, გამოძიების ხელთ არსებული მტკიცებულებები მიუთითებს, რომ აღნიშნული ანტენები კვლავ გამოყენებული იქნება მოსახლეობისათვის უსასყიდლოდ გადასაცემად იმავე სქემით, როგორც ეს უკვე განხორციელდა ბოლო დროის განმავლობაში „გლობალ კონტაქტ კონსალტინგის" მიერ.

შესაბამისად, პროკურატურამ შუამდგომლობით მიმართა სასამართლოს ყადაღის გამოყენების შესახებ, რაც, როგორც აღვნიშნეთ, სასამართლოს მიერ დაკმაყოფილდა.

internet.ge