შინაგან საქმეთა სამინისტროს თანამშრომლებმა მესტიაში, თეთნულდის მთაზე ჩარჩენილი 4 რუსი ალპინისტის სამძებრო ღონისძიებები დღეს დილიდან განაახლეს. ამის შესახებ „ინტერნეტ.ჯი“-ს სამეგრელო-ზემო სვანეთის გუბერნიაში განუცხადეს.

მათი ინფორმაციით, ცნობილია ტურისტების შესაძლო ადგილმდებარეობა და მათი ჩამოყვანა დღის ბოლომდე მოხდება.

ცნობილია, რომ ტურისტები ზღვის დონიდან 3 700 მეტრზე იმყოფებიან. ერთ-ერთ მათგანს კი ფეხი აქვს დაზიანებული. მათი დაკარგვის შესახებ ინფორმაცია დაკარგულთაგან ერთ-ერთის მეგობარმა ქალმა გაავრცელა.

ქართველ სამართალდამცავებს ქალბატონმა აცნობა, რომ 4 კაციანი ჯგუფი მესტიის დასალაშქრად 6 დღის წინ წავიდა და მთაში დაიკარგა. ალპინისტებმა მათი დაკარგვის შესახებ ინფორმაცია მეგობარს ტელეფონით მიაწოდეს.

სამაშველო ჯგუფები დანიშულების ადგილზე მისვლას გუშინ მთელი დღის განმავლობაში ცდილობდნენ, თუმცა  უამინდობის გამო ტურისტების ამოყვანა ვერ მოხერხდა.

Internet.ge