საქართველოში ყველაზე გავრცელებული მამაკაცის სახელი კვლავ გიორგია, ქალის კი - ნინო.

სახელმწიფო სერვისების განვითარების სააგენტო 2012 წლის მონაცემებს აქვეყნებს, რომლის მიხედვითაც ირკვევა, რომ წელსაც ყველაზე მეტ ახალშობილ გოგონას ნინო, ხოლო ბიჭს გიორგი დაარქვეს.

თუმცა გასულ წლებთან შედარებით, ახალშობილებისთვის სახელების შერჩევის ტენდენცია იცვლება. წელს გოგოს  ყველაზე პოპულარული სახელი ნინოა, გასულ წელს კი მარიამს არქმევდნენ.  სახელ გიორგის პოპულარობით თითქმის არ ჩამოუვარდება ნიკოლოზი.

სახელმწიფო სერვისების განვითარების სააგენტოს ინფორმაციით, რომელიც მონაცემთა ერთიან ბაზას ეყრდნობა, 2012 სტატისტიკის მიხედვით, ვაჟების პოპულარული სახელებია: გიორგი (1583) და ნიკოლოზი (1521); ასევე, გავრცელებული სახელებია:  ლუკა  (955), ანდრია (839), საბა (835), დავითი (801), ალექსანდრე  (773), მათე (327), დიმიტრი (295), გაბრიელი (275), ირაკლი (220), ილია (210), ზურაბი (206), დაჩი (164), თეიმურაზი (136), ცოტნე (136), ლევანი (131), ივანე (130), ლაზარე (126), თორნიკე (116) და სხვა.

ახალშობილი გოგონების პოპულარული სახელებია: ნინო (2523), მარიამი (1669), ბარბარე (979), ანასტასია (939), ანა (910), ელენე (872), ელიზავეტა (588), ნია (365), თამარი (346), ნატალია (322), თეკლე (265), სალომე (255), ქეთევანი (251), ლია (200), ანამარია (158), თათია (131), სოფია (127), ნანა (125), ეკატერინე (104), თინათინი (103) და სხვა.

რაც შეეხება ყველა ასაკში, სხვადასხვა დროს პოპულარულ სახელებს, მონაცემთა ერთიანი ბაზის თანახმად, საქართველოში მამაკაცის ყველაზე გავრცელებული სახელი გიორგია (193 828), მას მოსდევს: დავითი   90 713, ნიკოლოზი 59 784, ზურაბი 49 403, ალექსანდრე 45 488, ლევანი 40 496, თეიმურაზი 36 834, ირაკლი 35 150, მიხეილი 28 232, ლუკა 27 692, თამაზი 27 585, ავთანდილი 24 317, მამია 23 455, ნოდარი 23 061, გურამი 23 044, ლაშა 22 693, გოჩა 22 063, ზაზა 20 768, კახაბერი 20 308 და სხვა.

ქალბატონებს ყველაზე ხშირად არქმევენ: ნინოს 246 879, მას მოსდევს მარიამი 100 982, თამარი 97 531, ნანა 69 653, ნათია 66 947, ანა 64 980, ლია 55 059, ქეთევანი 50 272, მაია 45 952, ელენე 39616, თინათინი 36000, ეკატერინე 34182, სოფია 31843, ნატალია 31195, ხათუნა 25370, ირინე  23716, ელიზავეტა, 23217, სალომე 21444, რუსუდანი 20530, ქრისტინე 9677 და სხვა.

სახელმწიფო სერვისების განვითარების სააგენტო ავრცელებს ასევე ინფორმციას უცნაური სახელების შესახებ. სააგენტოს ინფრომაციით, ბაზაში აღრიცხული იშვიათი სახელებია: მოქეიფე, თაგუნა, ფემისტოკლე, ფიზიკა, პელე, გარინჩა, კაცი, ქალი, ვებერთელა, მხედარი, კუსა, მამალი, თავადი, თადეუს, თანზილა, მამისავარ, მამილო, მამლუკი, მანილა, მგელა, ცაცია, ხუმარა, სამძიმარა, ვინარი, კუკუშა, ედემი, ფუჩქი, ნიუტონი, სევდაგულ, კეკლუცა, ნექტარი, ლამაზი, ვარგისო, და სხვა.