• თბილისი
  • 31°C
  • 19 სექტემბერი, 2017
article

ოტია იოსელიანი: ვაი ჩვენს პატრონს! ტაში, ტაში საქართველო...

"ჭეშმარიტი რწმენის გარეშე ადამიანი არარაობაა, ცოდნის შეუძენლად კაცი არ ვარგობს და განათლების უპირველესი წყარო წიგნია. წიგნის სიყვარული, ტრადიციების ერთგულება და ეროვნული საუნჯის გაფრთხილება - ესაა ჭეშმარიტი ქართველობა", - ასე ფიქრობს 80 წელს გადაცილებული მწერალი.

მისთვის ყველაზე განუყრელი ნივთი წიგნი და ჩიბუხია. ყველასთვის ის გამორჩეული ქართველი და ქართული სიტყვის მცველია. თუმცა მხოლოდ სახელი და გვარი ოტია იოსელიანი ყველაფერს ამბობს. სწორედ ოტია იოსელიანია დღეს ,,პრესა.ჯი’’-ს სტუმარი. მწერლისთვის ინტერვიუს მიცემა უინტერესო გახდა, ვინაიდან თვლის, რომ მის მოსაზრებას არავინ კითხულობს და მითუმეტეს არავინ იზიარებს.

ამის მიუხედავად ბატონი ოტია მაინც დაგვთანხმდა ინტერვიუზე, მხოლოდ ერთი პირობით, იტყოდა იმას, რაც მას სურს და არა იმას, რაც ხშირად ჟურნალისტებს ,,აწყობთ’’. მწერლის თხოვნით ინტერვიუ მხოლოდ რამდენიმე კითხვით შემოიფარგლა, თუმცა მისი აზრი არსებულ რეალობაზე მკითხველისთვის ამომწურავია.

- როგორი იყო თქვენთვის 2010 წელი?

- ჩემთვის შემოქმედებითი იყო, შრომის და კითხვის წელი. ქვეყნისთვის დამაქცევარი, დასაღუპი, დამხობილი და დაწყევლილი. თუკი რამე იყო დარჩენილი ყველაფერი მოთავდა. სოფლის მეურნეობა, კულტურა და წესიერება აღარ არსებობს ქვყანაში.

თქვენ არ აკვირდებით საქართველოში არაფერს, მიჩერებიხართ ამერიკას, კანადას და ტკბებით იქაური ცხოვრებით, ჯამში ჩაიხედები და არაფერი გიდევთ. რა გიხარია შე დალოცვილო, ქმარი სახლშია წამოწოლილი და ცოლი ყინვაში თან ,,პაპიროსს’’ აბოლებს, თან ვაჭრობს. ესაა საქართველო?

დააქციეთ ქვეყანა მთავრობამაც და ჟურნალისტებმაც, რას დაემსგავსა ჩვენი გემოვნება? ან ტელევიზია რას გავს? ყველაფერზე ტაში, ტაში, ვის უკრავთ ტაშს ხომ უნდა ვიცოდეთ? ეს გაკეთდა - ტაში, ვიღაცამ ვიღაცას ყვავილი აჩუქა - ტაში, რა უბედურებაა ეს? ეს რა პოლიტიკაა? ჟურნალისტები და პოლიტიკოსები ერთმანეთში ხართ არეული, ვერ გარჩევთ ერთმანეთისგან მე პირადად.

- პოლიტიკა ახსენეთ და ალბათ ბოლო პოლიტიკურ მოვლენებზეც საკუთარი მოსაზრება გაქვთ, როგორ ფიქრობთ ლევან გაჩეჩილაძის მიმართ წაყენებული ბრალდებები შეესაბამება სინამდვილეს?

-  მე თუ რაღაც არ მინახავს იმაზე საერთოდ არ ვლაპარაკობ. ჟურნალისტი ხომ არ ვარ ასე, ჰაერზე, რაც მომეპრიანება ის ვთქვა? არც გაჩეჩილაძეს აქვს სინდის-ნამუსი, არც ბურჯანაძეს, არც მის ქმარს და არც ხელისუფლებას. ასე, რომ იქნებოდა მე ადრევე მივხვდი მაგას, აბა ერთ დღეს ერთს ამბობდე, მეორე დღეს მეორეს და მესამეს აკეთებდე რას გავს ეს? გადავირიე კაცი. ეგაა პოლიტიკა? ვაი მაგათ პატრონს, მაგათმა პოლიტიკის არაფერი იცოდნენ. თქვენ მკითხეთ რა იყო მნიშვნელოვანი 2010 წელსო, მე მიმაჩნია, რომ დამაქცევარი იყო ყველაფერი, რაც ამ წელს მოხდა.

- ფიქრობთ, რომ პოლიტიკურ ცხოვრებაში პოზიტიურ მოვლენას 2010 წელს ადგილი არ ჰქონია?

- რა პოზიტივზე და კარგზეა საუბარი, აღარ არსებობს კარგი საქართველოში არაფერი, სადაა ცხოვრება საერთოდ. ინგლისურის მასწავლებლები ჩამევიყვანოთო და ჩამეიყვანეს, რა გეინგლისურებათ თქვე დალოცვილებო ქართული არ ვიცით. სახარებაში გვიწერია ,,მოიპოვე ლუკმა ოფლითა შენითაო’’ და არა ამერიკის გრანტები ჭამეო. მეურნეობისკენ არც თქვენ იხედებით ჩვენი მთავრობა-ოპოზიციასავით. ყველაფერი რაც გაგვაჩნდა ჯართში ჩავაბარეთ და ზღვის ქაფისგან გვინდა ახლა სახელმწიფო შევქმნათ? ქვეყანა რომ გვდომებოდა, ასე არ მოვიქცეოდით, მარტო მთავრობაზე არ მაქვს ლაპარაკი.

- წლის ბოლოა და ტარდება გამოკითხვა, ვინ არის წლის ადამიანი, თქვენ ვის დაასახელებდით?

- წლის ადამიანი დამაქცევარს თუ მკითხავთ, თორემ ჩვენ გმირები არ გვყავს.  დამაქცევარია ყველა, ვინც ქვეყანაზე არ ფიქრობს, ვინც ხალხზე არ ფიქრობს და სარწმუნოებაზე. ჰკითხეთ ერთი ჩვენი სოფლის მეურნეობის მინისტრს რამდენი ტონა სიმინდი მოვიდა წელს საქართველოში თუ გიპასუხებთ?

დაქცეულია საქართველო და რა დადებით მოვლენებზე უნდა ვილაპარაკო? ვაი ჩვენი ცოდვა, რომ განათლების მინისტრი შაშკინი იქნება და ჩვენი ბავშვების განათლებაზე ეგ იზრუნებს. აღარც პედაგოგის კულტურაა საქართველოში, მოსწავლე მასწავლებელბზეა შეყვარებულები და დირექტორს მეთორმეტე კლასელი ცოლად უნდა. შვილები მშობლებს ხოცავენ, ქმარი საშოვარზე უშვებს ცოლს 10-15 წლით, დევიღუპეთ და ეგაა.

- რას ელით 2011 წლისგან?

- ველოდები სიმშვიდეს და ჩემი ქვეყნის გამოფხიზლებას, ხალხის გამოფხიზლებას, კულტურულ და წესიერ ცხოვრებას. ქართველები ყოველთვის, კავკასიელებს შორისაც კი კულტურით და წესიერებით გამოვირჩეოდით ახლა რა დაგვეტაკა? ევროპელობას ვჩემულობთ. ცოლს ევროპელობა უნდა, ქმარი ქართველობას იჩემებს, ასეთი ოჯახი იქნება? ვაი ჩვენს პატრონს!