• თბილისი
  • 31°C
  • 19 სექტემბერი, 2017
article

ივანიშვილი: დიდი ილიას სიტყვები სიმღერით წარმოთქვა ჩვენმა აკაკიმ: „ჩონგური საქართველოა...“ (ვიდეო)

გურამ დოჩანაშვილის ერთ ლამაზ მოთხრობაში „ბახვას გულმა რეჩხი უყო (ციკლიდან „ქართული ხასიათები“)" ასეთი ეპიზოდია აღწერილი: ბახვას ბიჭს თავში კეტი ჩაარტყა კაცმა, რომელიც გამწარდა, რადგან ბავშვები დასდევდნენ და, რატომღაც, „ადის-აბებას“ ეძახდნენ. მოთხრობაში განვითარებული სიუჟეტის მიხედვით, ბახვა და მისი მეგობარი ანდრადე ამ კაცს პოულობენ და ბახვასთან სახლში მიჰყავთ, რათა ბავშვს ბოდიში მოუხადოს - მან ბახვას შვილს შეცდომით ჩაარტყა კეტი.

როცა ფიცხი ბახვა ინტერესდება, რატომ და როგორ დასცინიან კაცს ბავშვები და გაიგებს, რომ „ადის-აბებას“ ეძახიან, გაიკვირვებს, ამაში საწყენი რა არისო. და აი, აქ გურამ დოჩანაშვილი დაცინვის ობიექტს გენიალურად ახსნევინებს განაწყენების მიზეზს: „სიხშირეშია, ბატონო, საქმე...“

ბიძინა ივანიშვილმა ძალიან მოუხშირა პოლიტიკური გამოსვლების დროს ლიტერატურული ციტატების მოხმობას. როცა ლიტერატურული ციტატების მოხმობაზე ვაკეთებთ აქცენტს, თავისთავად იგულისხმება, რომ ციტატა სულაც არ არის ციტატა - ის ან არსობრივად დამახინჯებულია, ან შეცდომითაა მოყვანილი, ან კიდევ - სულ სხვა ვინმეს მიეწერება ხოლმე.

ბოლო ასეთი კურიოზი საჩხერეში კოალიცია „ქართული ოცნების“ გახსნის დროს მოხდა, როცა ბიძინა ივანიშვილმა აკაკის ცნობილი სიტყვები „ჩონგური საქართველოა, სიმები ჩვენ ვართ ყველაო“ ჯერ იყო და, ილიას მიაწერა, მერე კი აკაკი წერეთელი, ლამის იყო, კომპოზიტორად გამოიყვანა:

„დიდი ილიას სიტყვები ლექსად სიმღერით წარმოთქვა ჩვენმა მგოსანმა, ჩვენმა აკაკიმ: „ჩონგური საქართველოა, სიმები ჩვენ ვართ ყველაო...“

იქნებ, ბატონი ბიძინა ივანიშვილი თავად მიხვდეს, ან მისი გარემოცვიდან ვინმემ უთხრას, რომ „სიხშირეშია, ბატონო, საქმე...“

წყარო: "დრონი.ჯი"