• თბილისი
  • 12°C
  • 19 ნოემბერი, 2019
article

„ან ღიად დაიცავთ საკუთარ რეპუტაციას ან ხონჩით მიართმევთ ხარკს, ე. ი თქვენს თავისუფლებას ბოროტ და ახირებულ ბატონს“ - გიორგი კაპანაძე მამუკა ხაზარაძესა და ბადრი ჯაფარიძეს

პრესა.ჯის დირექტორი და ინტერნეტ მედია ჯგუფის დამფუძნებელი, გიორგი კაპანაძე თიბისი ბანკის ირგვლივ განვითარებულ მოვლენებს სოციალურ ქსელში გამოქვეყნებული პოსტით ეხმაურება. 

„ბნელ ოთხმოცდაათიანებში, როცა წარმოუდგენელი იყო ბიზნესი რეკეტის გარეშე, თქვენ შექმენით მყარი ფინანსური ინსტიტუტი და დაწერეთ წარმატების სამაგალითო ისტორია.

პირადად მე, თიბისი ბანკის სერვისების ერთგული მომხმარებელი ვარ აგერ უკვე 21 წელზე მეტია და მისთვის არასოდეს მიღალატია.

ამიტომ, ბატონო მამუკა, ბატონო ბადრი, ნურც თქვენ გვიღალატებთ ჩვენ - ასეულ ათასობით ერთგულ მომხმარებელს.

უბრალოდ, ვალდებული ხართ, როგორც ბნელ ოთხმოცდაათიანებში აჩვენეთ ქვეყანას შეუპოვრობისა და გამბედაობის მაგალითი, ახლაც ისე იმოქმედოთ 10 ათასი თიბისელის, ასობით ათასი მომხმარებლისა და ჩვენი მშვენიერი ქვეყნისათვის.

იცით რომ კრიზისულ მომენტში, დამფუძნებელი მამების მიერ მიღებულმა გადაწყვეტილებამ შექმნა პლანეტის ყველაზე ძლიერი და წარმატებული სახელმწიფო.

ისინი არ შეუშინდნენ დამპყრობლებს და გაიმარჯვეს.

არც რუსთავი 2-მა და მისმა გენერალურმა დირექტორმა დაიხია უკან, დამპყრობელი ივანიშვილის წინაშე, ბოლომდე იბრძოლა და შედეგად, გადარჩა როგორც ნომერ პირველი ტელეკომპანია, ისე მყიფე ქართული დემოკრატიაც.

ამიტომ, ყოველგვარი ქვეტექსტის გარეშე, პირდაპირ გეტყვით: მოქმედების დროა - ან ღიად და მყარად დაიცავთ საკუთარ რეპუტაციას, კარიერას, იმას, რასაც 27 წლის მანძილზე აშენებდით ან ხონჩით მიართმევთ ხარკს, ე. ი თქვენს თავისუფლებას ერთ ბოროტ და ახირებულ ბატონს.

იყო დრო, როცა ამერიკის დღევანდელ პრეზიდენტს 2 მილიარდამდე ვალი ჰქონდა ანუ ნიუ იორკის ქუჩებში მყოფი უსახლკაროები მასზე მინიმუმ 2 მილიარდით მდიდრები იყვნენ.

თუმცა, მან, აჯობა, პირველ რიგში საკუთარ შიშებს და ხელახლა გაიბრწყინა...

ბატონო მამუკა, ბატონო ბადრი, რას აპირებთ თქვენ?“, - წერს გიორგი კაპანაძე.