• თბილისი
  • 26°C
  • 05 ივნისი, 2020
article

მარნეულში მედპერსონალის ინფიცირების კიდევ ერთი შემთხვევა დაფიქსირდა

მედპერსონალის ინფიცირების კიდევ ერთი შემთხვევა ამჯერად მარნეულში დაფიქსირდა. კორონავირუსი სასწრაფო დახმარების ბრიგადის მენეჯერს დაუდასტურდა.

რეგიონში ეს უკვე მეჩვიდმეტე შემთხვევაა, მათგან 9 გამოჯანმრთელებულია, თუმცა არ არის გამორიცხული მუნიციპალიტეტში ეპიდვითარება შეიცვალოს, რადგან ინფიცირებულთან შეხება მის თანამშრომლებს ჰქონდათ.

"კორონავირუსით არის დაავადებული სასწრაფოს თანამშრომელი, ეს დაკავშირებულია თეთრიწყაროს კლასტერთან, ამ რეგიონის ერთი თანამშრომელი მუშაობდა სასწრაფოში. ამჟამად რაიონში 5 ბრიგადაა, ყველა მათგანს ჩაუტარდება ტესტირება და მოვიკვლევთ ყველა კონტაქტს,"- განაცხადა მარნეულის დაავადებათა კონტროლისა და საზოგადოებრივი ჯანდაცვის ცენტრის ხელმძღვანელმა ეთერ ლაფერაძემ.

მარნეულში ექიმების მასობრივი ტესტირება იწყება. ადგილზე ეპიდემიოლოგებს ელოდებიან. 

"COVID-19-ით მარნეულის სასწრაფო სამედიცინო სამსახურის მენეჯერი დაინფიცირდა. ახლა მიმდინარეობს კონტაქტების გამოვლენა და როგორც ვიცი, ყველა იმ პიროვნებას ჩაუტარდება ანალიზი, ვინ დაკავშირებულია აღნიშნულ კონტაქტთან,"- აცხადებს მარნეულის მუნიციპალიტეტის მერი ზაურ დარგალი. 

საერთო ჯამში ქვეყანაში სასწრაფოს 25 თანამშრომელია ინფიცირებული.

 

წყარო: რუსთავი 2


თეგები :